Një shpërthim ka ndodhur rreth orës 05:00 të mëngjesit në stacionin qendror të Augsburgut, në Gjermani, duke shkaktuar një ndërhyrje të gjerë policore. Sipas raportimeve të mediave gjermane, një objekt ende i paidentifikuar ka shpërthyer në një korridor të brendshëm të një ndërtese pranë stacionit. Si pasojë, dy persona raportohet se kanë pësuar lëndime të lehta për shkak të valës së goditjes. Shpërthimi ka shkaktuar gjithashtu dëmtime në xhamat e dritareve.

Shkaqet dhe rrethanat e ngjarjes mbeten ende të paqarta. Në vendngjarje kanë mbërritur ekipet e specializuara kundër bombave nga Zyra e Hetimeve Penale të Landit të Bavarisë, të cilat po kryejnë kontrolle dhe verifikime. Policia ka njoftuar se, për shkak të operacionit në vazhdim, disa rrugë përreth stacionit kryesor janë mbyllur për qarkullimin e automjeteve. Ndërprerje janë raportuar edhe në transportin publik lokal në Augsburg.

Ndërtesa e stacionit dhe platforma 1 janë aktualisht të mbyllura, ndërsa operacioni policor ka shkaktuar edhe pengesa në trafikun hekurudhor. Autoritetet vijojnë hetimet për të përcaktuar se çfarë shkaktoi shpërthimin dhe nëse objekti i përdorur ishte pjesë e një veprimi të qëllimshëm.

/rtsh.al/