Një pikë kontrolli ukrainase në kufirin me Moldavinë është shënjestruar nga një sulm me dron rus në orët e para të së mërkurës, 9 shtator. Si pasojë e sulmit, dy persona kanë humbur jetën dhe tre të tjerë janë plagosur.

Sipas një deklarate të rojes kufitare ukrainase, të publikuar në Telegram, objektivi i sulmit ishte pika ndërkombëtare e kontrollit në Starokozatse.

Guvernatori i Odesës, Oleh Kiper, konfirmoi bilancin paraprak të viktimave, duke bërë me dije se dy persona u vranë dhe tre të tjerë u plagosën.

“Gjatë natës, dronët armikë sulmuan një pikë kontrolli ndërkombëtare në Starokozatse, në kufirin me Moldavinë”, deklaroi Kiper përmes Telegramit.

Sulmi shkaktoi dëme edhe në objektet e pikës kufitare, duke çuar në pezullimin e përkohshëm të operacioneve.

Autoritetet ukrainase njoftuan gjithashtu se kanë informuar autoritetet përkatëse moldave për incidentin.

Pika e kontrollit Starokozatse ndodhet në pjesën juglindore të kufirit Ukrainë-Moldavi, rreth 70 kilometra nga Odesa dhe rreth 130 kilometra nga kryeqyteti i Moldavisë, Kishinau.

/rtsh.al/