Me rastin e fillimit të vitit të ri shkollor, Drejtori i Përgjithshëm i Policisë së Shtetit, Drejtues Madhor Skënder Hita, u ka përcjellë një mesazh urimi nxënësve, mësuesve dhe prindërve.

Në mesazhin e tij, Hita thekson rëndësinë e sigurisë së nxënësve dhe angazhimin e Policisë së Shtetit për të garantuar një mjedis të sigurt gjatë vitit të ri shkollor.

Drejtori i Përgjithshëm nënvizon se nisja e vitit shkollor shoqërohet me një përgjegjësi edhe më të madhe për Policinë e Shtetit.

Në vijim, ai u bën thirrje nxënësve të mos heshtin përballë shqetësimeve apo problematikave që mund të hasin dhe të kërkojnë ndihmë.

“Të dashur nxënës, të nderuar mësues dhe prindër,

Çdo fillim viti shkollor sjell një energji të veçantë.Oborret e shkollave mbushen sërish me fëmijë e të rinj, me emocionet e takimeve, me pritshmëri dhe me ëndrra të reja, ndërsa për prindërit interesimi për sigurinë dhe rezultatet në mësime.

Sot, për nxënësit nis një tjetër rrugëtim drejt dijes, ndërsa për ne, Policinë e Shtetit, nis një përgjegjësi edhe më e madhe: të kujdesemi që ky rrugëtim të jetë i sigurt, sepse për sigurinë tuaj nuk bëjmë kompromis dhe nuk pushojmë. 

Nëse diçka ju shqetëson, flisni, sepse zëri juaj ka shumë rëndësi për ne.

Na priftë e mbara dhe paçi një vit shkollor të suksesshëm e të sigurt!”, shkruan Hita.

/rtsh.al/