Një 22-vjeçar është arrestuar në zonën e Milanos në Itali, nën dyshimin për stërvitje me qëllime terroriste. Sipas hetimeve, i riu dyshohet se kishte planifikuar sulme ndaj një sinagoge hebraike dhe një vendi të lutjes islame në zonën përreth qytetit.

Arrestimi u krye mëngjesin e 29 tetorit nga karabinierët e Njësisë së Operacioneve Speciale (ROS), në bashkëpunim me Komandën Provinciale të Milanos, pas një urdhri të lëshuar nga gjyqtari i hetimeve paraprake i gjykatës së qytetit. Hetimi drejtohet nga Prokuroria e Milanos dhe është përqendruar te analiza e pajisjeve elektronike të të dyshuarit.

Sipas autoriteteve italiane, nga kontrolli i pajisjeve elektronike janë zbuluar të dhëna që sugjerojnë se 22-vjeçari kishte studiuar në detaje mënyrat e përgatitjes së mjeteve shpërthyese dhe modifikimit të armëve të zjarrit. Hetuesit kanë dokumentuar gjithashtu aktivitet të vazhdueshëm të vetëtrajnimit me qëllime terroriste dhe kërkimin e substancave kimike që mund të përdoreshin për prodhimin e eksplozivëve.

Në pajisjet e tij janë gjetur edhe materiale propagandistike dhe përmbajtje që nxisnin kryerjen e veprave penale. Mes tyre, sipas hetuesve, kishte shkrime dhe ide të Anders Behring Breivik, autorit të sulmeve terroriste të vitit 2011 në Oslo dhe në ishullin Utøya të Norvegjisë, ku u vranë 77 persona.

Materialet e zbuluara përmbanin ide supremaciste, përshpejtimiste, ksenofobe dhe mohimin e Holokaustit. Për këto dyshime, i riu po hetohet për veprën penale të stërvitjes për veprimtari me qëllime terroriste, përfshirë terrorizmin ndërkombëtar.