Kryeministri Edi Rama ka përsëritur thirrjen për dialog me protestuesit, duke vendosur para godinës së Kryeministrisë fletë me mbishkrime me fjalën “Dialog”.

Kjo është ftesa e radhës që kryeministri ka bërë përgjatë ditëve të fundit, si pjesë e përpjekjeve të tij për të ftuar përfaqësues të protestave në bisedime.

Më herët, kryeministri Rama ka theksuar se është i gatshëm të ulet në tryezë me këdo që beson në dialog, në çdo vend dhe në çdo kohë, për të shkëmbyer pikëpamje edhe kur ato janë të kundërta.

Ai ka nënvizuar se e drejta e protestës është e pamohueshme, por se dhuna nuk justifikohet nga asnjë arsye dhe se ata që kryejnë akte dhune ose dëmtojnë pronën publike do të përballen me ligjin.

Ftesa radhës vjen kur protesta ka hyrë në ditën e 20-të dhe ka mbledhur studentë, pedagogë dhe qytetarë para institucioneve qeveritare, me kërkesën kryesore për dorëheqjen e kryeministrit.

Deri më tani protestuesit kanë refuzuar  ftesat e kryeministrit për dialog, duke këmbëngulur se nuk ka bisedime pa largimin e kreut të qeverisë.

Nga ana e tij, Rama ka deklaruar se qeveria mbetet e hapur për komunikim me ata që zgjedhin rrugën e dialogut dhe duke u distancuar nga dhuna.

/rtsh.al/