Blutë e kryeqytetit kanë sekuestruar 19 kg kanabis. Katër persona janë arrestuar nga policia, pasi akuzohen për “prodhim dhe shitje të narkotikëve”.

Efektivët e Tiranës kanë ndaluar për kontroll një automjet tip Benz, në bagazhin e së cilit kanë gjetur dhe sekuestruar 2 çanta të mbushura me kanabis me peshë 19.30 kg.

Një prej të arrestuarve gjatë kontrollit të mjetit, ka kundërshtuar punonjësit e Policisë dhe nuk është bindur ndaj urdhrave të tyre.

Po sashtu, në kontrollin e banesës së një tjetër prej të arrestuarve, i gjet një armë zjarri pushkë, 200 fara të dyshuara narkotike kanabisi. Lënda narkotike së bashku me sendet e tjera të jashtëligjshme, 2 automjete e 7 aparate celular, u sekuestruan në cilësinë e provës materiale.

“Sektori për Hetimin e Narkotikëve, në vijim të operacioneve për goditjen e veprimtarive kriminale në fushën e narkotikëve, pas një pune të mirëfilltë hetimore disamujore, ndjekur me metoda speciale të hetimit, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, dhe në zbatim të masave të planeve operacionale “Tempulli 3”, dhe “Sundimi i ligjit” ka organizuar dhe ka finalizuar operacionin policor të koduar “Green”.

Si rezultat i këtij operacioni u bë arrestimi i shtetasve:

– G. H., 50 vjeç, banues në Tiranë, për veprat penale “Prodhimi dhe shitja e narkotikëve” kryer në bashkëpunim dhe “Mosbindja ndaj urdhrit të punonjësit të policisë së rendit publik”;

– A. K., 37 vjeç, banues në Tiranë, për veprat penale “Prodhimi dhe shitja e narkotikëve” kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”;

– S. G., 54 vjeç, dhe O. B., 43 vjeç, të dy banues në Tiranë, për veprën penale “Prodhimi dhe shitja e narkotikëve” kryer në bashkëpunim”, thuhet në njoftim.

/rtsh.al/