Papa Françesku iu bëri thirrje politikanëve libanezë që të zgjedhin sa më shpejt një president të ri, në mënyrë që institucionet e vendit të fillojnë të funksionojnë sërish normalisht.

“Institucionet e Libanit kanë nevojë të rifillojnë funksionimin për të ndërmarrë reformat e nevojshme dhe për të mbështetur rolin e vendit si një shembull të bashkëjetesës së paqtë fetare,” u shpreh Ati i Shenjtë në fund të lutjes së tij Angelus që mban të dielave në sheshin Shën Pjetër.

Libani, 30 përqind e popullsisë së të cilit është e krishterë, ka mbetur pa president që pas mbarimit të mandatit të Michel Aoun në tetor të vitit 2022. Asnjë nga dy grupet kryesore parlamentare, Hezbollah i mbështetur nga Irani dhe kundërshtarët e tij, nuk kanë shumicën e kërkuar për zgjedhjen e kreut të shtetit dhe nuk kanë rënë dakord për një kandidat konsensusi.

Vendi, kryeqyteti i të cilit, Bejruti, dikur cilësohej si Parisi i Lindjes së Mesme, aktualisht ndodhet në një fazë armëpushimi në konfliktin mes grupit militant Hezbollah, aleat i grupit militant palestinez Hamas, dhe Izraelit. Që nga tetori i vitit të kaluar, kanë humbur jetën të paktën 3,961 persona dhe janë plagosur më shumë se 16,500 të tjerë.

/rtsh/