Hamas ka lëshuar një deklaratë duke shprehur “shqetësim të madh” pas rrëzimit të helikopterit që transportonte presidentin iranian Ebrahim Raisi dhe zyrtarë të tjerë iranianë. 

Detajet rreth rrëzimit janë ende të paqarta dhe Hamasi ka shprehur “solidaritet” ndaj presidentit dhe “popullit iranian”.

“Në këtë incident të dhimbshëm, ne shprehim solidaritetin tonë të plotë me Republikën Islamike të Iranit, udhëheqjen, qeverinë dhe popullin e saj dhe i lutemi Allahut të Plotfuqishëm që të mbrojë dhe garantojë sigurinë e Presidentit iranian dhe delegacionit të tij shoqërues, dhe të mbajë të gjithë larg dëmit nga populli vëlla iranian”, thuhet në deklaratën e Hamasit.

Ndërkaq, tensionet mbeten të mprehta në të gjithë Lindjen e Mesme ndërsa Izraeli zhvillon luftën në Gazë kundër grupit militant palestinez Hamas, i cili është  aleat i Iranit.

Ndërkohë, një konflikt në hije prej dekadash midis Izraelit dhe Iranit shpërtheu hapur në prill, kur Irani nisi një sulm të paprecedentë ndaj Izraelit.

Teherani tha se sulmi ishte hakmarrje për një sulm ajror të dyshuar vdekjeprurës izraelit në konsullatën e Iranit në Siri. Shkëmbimi i zjarrit vetëm sa ka ndezur më tej tensionet në Lindjen e Mesme.

Grupet përfaqësuese iraniane – duke përfshirë Houthi-t në Jemen dhe Hezbollahun në Liban – janë përfshirë gjithashtu në përshkallëzimin e përleshjeve në rajon.

/rtsh.al/