Ish-ambasadori Sokol Gjoka, i ftuar në emisionin “Ngjarja Kryesore” në RTSH 1, deklaroi se lufta ndërmjet Izraelit dhe Iranit ka për të përfunduar së shpejti me kapitullimin e regjimit të Ajatollahut.

Sipas tij, administrata amerikane i ka ofruar Iranit atë që në diplomaci quhet “shkopin dhe karotën”, sepse jo pa qëllim gjatë kohës të uljes në bisedime atyre iu është thënë që nuk do zgjasin më shumë sesa 60 ditë, ku Iranit i kërkohej tërheqja pa kushte nga programet për pasurimin e uraniumit për qëllimet ushtarake.

“Për shkak të situatës të krijuar, kjo çështje ka për tu zgjedhur shpejt me një imponim ose me një kapitullim të Iranit. Natyrisht regjimi i iranian do detyrohet të largohet. Nga ana tjetër Irani duhet të heqë dorë nga zhvillimi i më tejshëm i armës bërthamore.”

Më tej duke komentuar precizonin e sulmeve izraelite, Gjoka shtoi se, “shërbimi sekret izraelit Mossad kishte lokalizuar të gjitha objektivat dhe personat që do goditeshin në këtë sulm izraelit mbi Iranin. Kjo tregon që shërbimet janë përgatitur kohë më parë sepse dhe platformën politike ata e kanë pasur prej viteve 90’.”

/rtsh.al/