“Ahengu shkodran 2025”, eventi mblodhi artistë dhe dashamirës të muzikës së vjetër 

Në një nga pikat më të frekuentuara të qendrës së qytetit në Ditën Kombëtare të Trashëgimisë Kulturore, u zhvillua edicioni i 13-të i “Ahengut Shkodran”, eventi tashmë i kthyer në traditë, që mblodhi dhjetëra qytetarë dhe dashamirës të muzikës së vjetër shkodrane.

“Ishte risi që këtë vit e sollëm ahengun shkodran në zemër të Shkodrës, aty ku gjithmonë janë bërë ato xhirot e mbrëmjes nën meloditë e muzikës shkodrane”, tha udhëheqësi artistik, Bardhyl Hysa.

Grupi “Karajfilat që ka Shkodra” shoqëroi artistët me interpretimet e tyre, duke sjellë atmosferën e vërtetë të ahengut. Udhëheqësi artistik Bardhyl Hysa vlerësoi rolin e këngës popullore, duke e cilësuar atë një nga simbolet më të rëndësishme të qytetit.

Mjeshtri Ilir Zoga ndali vëmendjen tek dy momente të veçanta që i paraprinë këtij edicioni: botimi i librit nga Fahri dhe Esmerald Djepaxhija dhe ndarja nga jeta e ashikut të ahengut, Agim Molla.

“E para është një gjë pozitivë se i shtohet arkivës së qytetit një libër. Fatkeqësisht, ne humbën një këngëtar mjaft të denjë të ahengut, ose mund të them i fundit i brezit të tij”, tha Zoga.

Emocione të veçanta përjetoi edhe këngëtarja shkodrane Albana Fani, e cila erdhi posaçërisht nga SHBA për të marrë pjesë në këtë event.

“Gjithmonë kur vij në Shkodër, është një emocion i veçantë. Ishte kënaqësi që u ftova të jem pjesë e këtij ahengu”, tha këngëtarja.

Organizuar nga Qendra Kulturore “Pjetër Gaci” nën kujdesin e Bashkisë Shkodër, “Ahengu Shkodran” do të transmetohet i plotë në rrjetin e RTSH në ditët në vazhdim.

Gazetar: M. Gjini

/rtsh.al/