Një aksident i rëndë automobilistik me pasojë vdekjen e një personi ka ndodhur pasditen e sotme në veri të vendit. Ngjarja është regjistruar rreth orës 16:25, në aksin rrugor që lidh Shkodrën me Koplikun, konkretisht në fshatin Grizhë.

Në aksident janë përfshirë tre automjete, çka ka krijuar një përplasje zinxhir me pasoja fatale. Sipas informacioneve paraprake nga Policia e Shkodrës, mjeti i drejtuar nga shtetasi me iniciale A. M. është përplasur fillimisht me automjetin e drejtuar nga shtetasi V. X. dhe më pas ka goditur mjetin e tretë me drejtues shtetasin E. Gj.

Bilanci i viktimave dhe të plagosurve

Përplasja ka rezultuar fatale për një prej pasagjerëve, ndërsa tre persona të tjerë ndodhen nën kujdesin e mjekëve.

Viktima, shtetasi me iniciale Z. M., ishte pasagjer në automjetin e drejtuar nga A. M. Pavarësisht dërgimit me urgjencë në spital, ai ka ndërruar jetë në Spitalin Rajonal të Shkodrës si pasojë e plagëve të marra.

Dy prej drejtuesve të mjeteve dhe një pasagjere me iniciale Gj. M. kanë pësuar dëmtime. Ata ndodhen jashtë rrezikut për jetën.

Në vendngjarje ka mbërritur menjëherë grupi hetimor, i cili nën drejtimin e Prokurorisë po kryen veprimet procedurale për të zbardhur shkaqet e plota të kësaj tragjedie rrugore.

/rtsh.al/