Marrëveshja mes PS dhe ‘Rithemelimit’ për komisionet hetimore, është komentuar të enjten nga sekretari i Përgjithshëm i Partisë Demokratike, Enkelejd Alibeaj.

Nëpërmjet një postimi në rrjetet sociale, Alibeaj shprehet se ky është vetëm një pazar i ‘Rithemelimit’.

“Ngushtimi i objektit të hetimit të komisionit parlamentar të koncesioneve të shëndetësisë, nga 4 në 2, është pazari i radhës mes Foltores dhe Ramës”, shkruan Alibeaj.

Sipas tij, të katër koncesionet në shëndetësi, ai i dializës, check up-it, pajisjeve të laboratorëve dhe sterilizimit janë abuzive dhe dëmtojnë interesat e qytetarëve.

“Përzgjedhja për hetim vetëm i sterilizimit dhe check-up-it (SPAK ndërkohë e mbaroi hetimin e tyre) dhe lënia jashtë hetimit i dializës dhe laboratorëve, është pazar dhe arsyet e vërteta i dinë ata që para 6 muajsh e nisën kërkesën për të hetuar 4 koncesione, e sot bëhen gati të votojnë vetëm për 2”, shprehet Alibeaj.

Sipas tij, ‘Rithemelimi’ bojkotoi muaj të tërë parlamentin, ndezi revolucionin me tymuese duke u shitur për interesat e oligarkut të radhës.

“E megjithatë, të vërtetën nuk e fshehin dot sado të mundohen”, përfundon Alibeaj.

/rtsh.al/