Drejtori i Përgjithshëm i Autoritetit Kombëtar për Sigurinë Kibernetike, Bledar Kazia, ka folur sot në Konferencën Kombëtare për Sigurinë Kibernetike 2026, ku ka vënë theksin te avancimi i aktorëve keqdashës, rreziqet që sjell përdorimi i Inteligjencës Artificiale dhe nevoja për forcimin e mbrojtjes kibernetike.

Gjatë fjalës së tij, Kazia falënderoi institucionet dhe aktorët që kontribuojnë në sigurinë kibernetike, duke theksuar se kjo përgjegjësi nuk mund të përballohet nga një autoritet i vetëm.

“Sot shumica e linjës së parë të mbrojtjes janë këtu dhe dua t’i falënderoj për të gjithë punën që bëjnë, sepse sigurinë kombëtare nuk e ndërton dot një autoritet i vetëm.
Peizazhi i kërcënimeve nuk po ndryshon sa i përket Shqipërisë, por aktorët keqdashës po avancojnë, kjo falë dhe Inteligjencës Artificiale.
IA është pozitive, por ka edhe anën tjetër të medaljes sa i përket sigurisë. Aq sa na ndihmon, aq është edhe e rrezikshme për cenueshmërinë e këtyre sistemeve. Ajo që kemi vënë re është dhe përdorimi i AI në kuadër të dezinformimit”, tha Kazia.

Sipas tij, Autoriteti ka vazhduar investimet për të përshtatur edhe mbrojtjen, edhe reagimin, për sa i përket realitetit të ri ku gjendemi, jo vetëm në teknologji, por edhe në burime njerëzore.

“Autoriteti po hyn në një fazë përmirësimi edhe në kapacitetet e burimeve njerëzore, edhe në pjesën e trajnimit të të gjithë aktorëve që bëjnë pjesë në ekosistemin e sigurisë kibernetike.
Së bashku me Ministrinë e Arsimit kemi bërë të mundur futjen e sigurisë kibernetike si lëndë me zgjedhje në shkolla, në klasën e parë dhe të gjashtë.
Asgjë nuk do të ishte e mundur pa mbështetjen e partnerëve tanë, pa mbështetjen e SHBA-ve dhe gjej rastin të falënderoj edhe ambasadorin. Kanë qenë një ndihmë shumë e madhe.
Gjithashtu, dua të falënderoj BE-në, disa vende të BE-së dhe partnerë të tjerë që gjenden sot në këtë konferencë. Me të vërtetë janë shtylla më e fortë e avancimit që kemi, qoftë në teknologji, qoftë në burime njerëzore, qoftë në reagim.”, deklaroi Kazia.