Gati një muaj pasi u betua si deputet në Parlamentin britanik, Andy Burnham do të marrë sot zyrtarisht detyrën si kryeministër i ri i Mbretërisë së Bashkuar. Emërimi i tij vjen pas dorëheqjes së Sir Keir Starmer dhe shënon fundin e një periudhe 10-javore me zhvillime të vrullshme në Partinë Laburiste.

Kriza politike nisi pas rezultateve të dobëta të Laburistëve në zgjedhjet lokale në Angli dhe në votimet parlamentare në Skoci e Uells gjatë muajit maj. Edhe pse fillimisht kishte deklaruar se do të qëndronte në detyrë, Starmer njoftoi më 22 qershor dorëheqjen e tij, vetëm katër ditë pasi Burnham u rikthye në Westminster si deputet.

Pas largimit të Starmer, Burnham mbeti kandidati i vetëm për drejtimin e Partisë Laburiste, duke siguruar mbështetjen e 379 deputetëve laburistë dhe duke u zgjedhur lider i partisë. Kjo i hapi rrugën për t’u bërë edhe kryeministri i ri i vendit.

Gjatë paradites, Sir Keir Starmer pritet të paraqesë zyrtarisht dorëheqjen te Mbreti Charles III në Pallatin Buckingham, ndërsa më pas Andy Burnham do të ftohet të formojë qeverinë e re. Me këtë emërim, Burnham bëhet kryeministri i shtatë i Mbretërisë së Bashkuar në një dekadë

/rtsh.al/