Gjykata e Posaçme e Apelit për Korrupsionin dhe Krimin e Organizuar (GJKKO) ka shpallur vendimin e formës së prerë lidhur me procesin gjyqësor ndaj disa ish-zyrtarëve të lartë, duke ndryshuar pjesërisht vendimin e Shkallës së Parë. Mes të shpallurve të pafajshëm është edhe ish-drejtuesja e Autoritetit Rrugor Shqiptar (ARRSH), Sonila Qato, së bashku me tre bashkëpunëtorë të saj, pasi trupa gjykuese çmoi se faktet e paraqitura nuk përbënin vepër penale.

Trupi gjykues dhe vendimi i pafajësisë

Vendimi u mor nga trupa gjyqësore e Apelit të Posaçëm, e përbërë nga gjyqtarët Iliriana Olldashi, Engert Pëllumbi dhe Tereza Merkaj. Gjykata shqyrtoi ankimimet ndaj vendimit nr. 52, të datës 23 korrik 2025, të Shkallës së Parë dhe vendosi të rrëzojë akuzat kryesore për shkelje të barazisë në tendera për katër nga të pandehurit.

Në dispozitivin e zbardhur të vendimit, Gjykata e Apelit argumenton se bazuar në nenin 388, pika 1, germa “b” të Kodit të Procedurës Penale, fakti i hetuar nuk përbën vepër penale, duke sjellë pafajësinë e menjëhershme për:

Sonila Qato, e akuzuar për veprën penale “Shkelja e barazisë së pjesëmarrësve në tendera apo ankande publike”, parashikuar nga neni 258 i Kodit Penal.

Z. S.P, i cili shpallet i pafajshëm për të njëjtën akuzë të shkeljes së tenderave, si dhe i lihet në fuqi pafajësia për akuzën e “Falsifikimit të dokumenteve” (neni 186/2 dhe 3 i Kodit Penal).

E.G dhe Z. E.S, të dy të pastruar nga akuzat e shkeljes së barazisë në procedurat e prokurimit publik.

Lihen në fuqi dënimet për gjashtë të pandehurit e tjerë

Ndërsa struktura drejtuese dhe anëtarët e sipërpërmendur morën pafajësi, Gjykata e Posaçme e Apelit ka vendosur të lërë të pandryshuar pjesën tjetër të vendimit të Shkallës së Parë për gjashtë personat e tjerë të përfshirë në këtë dosje penale.

“Lënien në fuqi të vendimit nr. 52, datë 23.07.2025 të Gjykatës së Posaçme të Shkallës së Parë për Korrupsionin dhe Krimin e Organizuar për të pandehurit M.Sh, N.M, A.P, A.T, A.H dhe A.H.”

Në mbyllje të këtij procesi, i cili zgjati prej muajsh në dy shkallët e gjyqësorit të posaçëm, trupa e Apelit vendosi gjithashtu që të gjitha shpenzimet gjyqësore të kryera për këtë procedim të mbeten në ngarkim të shtetit. Ky vendim shënon kështu mbylljen e një prej dosjeve më të përfolura që lidheshin me menaxhimin e procedurave të tenderimit publik në infrastrukturë.

/rtsh.al/