Gjykata e Posaçme e Apelit për Korrupsionin dhe Krimin e Organizuar ka vendosur këtë të enjte të lërë në fuqi vendimin për heqjen e masës së sigurisë “Arrest në burg” për ish- ministrin e Mjedisit, Lefter Koka. Me këtë vendim, Apeli i GJKKO-së ka rrëzuar kërkesën e Prokurorisë së Posaçme (SPAK), e cila kërkonte rrëzimin e vendimit të Shkallës së Parë dhe mbajtjen në fuqi të masës shtrënguese.

Në një seancë të drejtuar nga gjyqtarja Tereza Merkaj, trupi gjykues shqyrtoi ankimin e ngritur nga SPAK kundër vendimit të Gjykatës së Shkallës së Parë (vendimi nr. 798), të marrë më 11 dhjetor 2025. Ky vendim kishte konstatuar humbjen e fuqisë së paraburgimit për Kokën, një masë kjo që kishte qenë aktive prej rreth katër vitesh.

Historiku i masës së sigurisë

Sipas të dhënave të pasqyruara në vendimin e Apelit, kalvari procedurial për këtë masë sigurie daton në marsin e vitit 2022.

Masa e paraburgimit për Kokën u dha fillimisht nga Gjykata e Posaçme e Shkallës së Parë dhe u ekzekutua nga oficerët e Policisë Gjyqësore mëngjesin e 29 marsit 2022, në orën 09:15.

Vetëm dy ditë pas ekzekutimit, më 31 mars 2022, Gjykata e konfirmoi dhe e la në fuqi këtë masë sigurie.

Në dhjetor të vitit 2025, Gjykata e Posaçme e Shkallës së Parë, përmes vendimit nr. 798, doli në përfundimin se masa e paraburgimit kishte humbur fuqinë e saj ligjore. Kjo ndodh për shkak të kalimit të afateve maksimale të paraburgimit pa një vendim përfundimtar, ose ndryshimit të rrethanave të hetimit.

Vendimi i sotëm i Apelit i jep formë të prerë (për këtë shkallë) konstatimit se mbajtja e mëtejshme e Lefter Kokës nën këtë masë specifike sigurie nuk është më e mbështetur në ligj.

Megjithatë, përballja ligjore mund të vijojë ende në instancën më të lartë të drejtësisë. Sipas njoftimit zyrtar të Gjykatës, kundër këtij vendimi të Gjykatës së Apelit, SPAK ka të drejtë të ushtrojë rekurs në Gjykatën e Lartë.

/rtsh.al/