“Puna ime është që nëse diçka nuk është e mjaftueshme për të fituar, nuk mund të jem i kënaqur. Puna ime është të gjej mënyra të tjera për të fituar, për të gjetur qasje që janë të ndryshme nga ato të mëparshmet. Dhe kjo është ajo që kemi bërë deri më tani”. Me dy ditë deri në finalen e Ligës së Kampionëve, trajneri i Arsenalit, Mikel Arteta, e sheh ndeshjen kundër PSG-së si një tjetër ngjarje të madhe historike për klubin anglez.

Pas triumfit të tyre në Premier League, “Topçinjtë” ende ëndërrojnë. “Dikush atje lart i ka rregulluar planetët për ta bërë këtë të ndodhë”, tha trajneri spanjoll në një intervistë të gjatë me Marca, duke folur për titullin e ligës. “Në vitet e mëparshme, ne ishim afër, por diçka mungonte. Atmosfera ishte e ndryshme që nga fillimi. Isha i bindur se do të ishim shumë afër. Jo fitores, sepse kjo varet nga shumë faktorë. Puna ime ishte t’i bindja ata të ndiheshin sikur ishin më të mirët. U dhashë energji dhe u thashë të shijonin veten si kurrë më parë”.

Tani është PSG-ja e Luis Enriques, rivali dhe miku për të cilin Arteta ka vetëm lëvdata. “E kujtoj me shumë dashuri për mënyrën se si i trajtonte lojtarët e rinj dhe për atë që ishte si lojtar”, thotë trajneri anglez. “Si trajner, ai demonstroi lidership duke ndjekur një rrugë të caktuar dhe, pavarësisht të gjitha kritikave, ai këmbënguli dhe në fund fitoi siç bëri. Ai është një shembull për të gjithë”.