Deputeti i Partisë Demokratike, Gazment Bardhi, e ka cilësuar mashtrim aksionin e qeverisë për evidentimin e ndërtimeve pa leje përmes dronëve. Në një postim në Facebook, Bardhi akuzon qeverinë se po e përdor këtë iniciativë si një justifikim për ‘aferën e radhës’ me paratë e taksapaguesve.

Sipas Bardhit, ky veprim është një ‘mashtrim’ i ngjashëm me atë të vitit 2022, kur u njoftua kontrolli i territorit me ‘satelitë fantazëm’.

“Ajo që nuk ndryshon prej 12 vitesh është epoka e mashtrimit të shqiptarëve nga Edi Rama,” shkruan Bardhi. “Ndryshon vetëm ‘mjeti’: nga satelitët kemi kaluar tek dronët!”

Ai thekson se e vërteta e kontrollit të territorit është që njerëzve “u shkelet syri para zgjedhjeve për t’u marrë votën, pastaj shpërthejnë ‘muçërit’ dhe u marrin shpirtin dhe kursimet e jetës.”

Bardhi përfundon duke theksuar se paligjshmëria nuk buron nga njerëzit, por nga vetë qeveria. “Problemi është vetë Edi Rama!” shkruan deputeti.

/rtsh.al/