Ambasada amerikane uroi të hënën Shqipërinë për inaugurimin e bazës së parë ajrore të NATO-s në Ballkanin Perëndimor. Baza është ngritur në Kuçovë.

Sipas një postimi në faqen zyrtare të ambasadës së SHBA-së në Shqipëri, ky është një gur kilometrik që ilustron përkushtimin e palëkundur të Shqipërisë ndaj parimeve të NATO-s “për të mbrojtur paqen, lirinë dhe demokracinë, duke iu kundërvënë kërcënimeve përmes parandalimit dhe mbrojtjes”.

I Ngarkuari me Punë i SHBA në Tiranë, David Wisner iu bashkua Presidentit Bajram Begaj, Kryetares së Kuvendit, Lindita Nikolla, Kryeministrit Edi Rama, Ministrit të Mbrojtjes Niko Peleshi dhe zyrtarëve të tjerë shqiptarë dhe të NATO-s gjatë ceremonisë së hapjes së bazës në Kuçovë.

Wisner përgëzoi angazhimin e Shqipërisë për modernizimin e ushtrisë së saj dhe përmbushjen e angazhimeve thelbësore të mbrojtjes të NATO-s, si mburojë e stabilitetit në Ballkanin Perëndimor.

“Si aleatë në NATO, ne qëndrojmë të bashkuar dhe të fortë.”, tha ai.

/rtsh.al/