Bashkimi Evropian ka reaguar ndaj procesit të certifikimit të partive politike për zgjedhjet lokale në Kosovë, duke shprehur zhgënjim për faktin që dy subjekte politike serbe nuk u certifikuan.

Në një deklaratë të zëdhënësit të BE-së, theksohet se “BE-ja shpreh zhgënjim për moscertifikimin e 2 partive politike serbe të Kosovës. Ne shprehim keqardhje për qëndrimin e marrë nga Vetëvendosje gjatë procesit të certifikimit”.

Sipas BE-së, një proces zgjedhor i suksesshëm duhet të jetë gjithëpërfshirës dhe të lejojë pjesëmarrjen e të gjitha komuniteteve.

Deklarata nënvizon se “çdo përjashtim i aktorëve politikë bie ndesh me parimin themelor të pjesëmarrjes kuptimplote demokratike”.

BE-ja kërkon nga institucionet përgjegjëse të Kosovës që të respektojnë Kushtetutën dhe ligjet e vendit, duke siguruar që procesi i certifikimit dhe ankesat e mundshme të trajtohen në përputhje me parimet e sundimit të ligjit.

BE-ja paralajmëroi se karakteri gjithëpërfshirës i zgjedhjeve lokale është i rëndësishëm për marrëdhënien e ardhshme mes Kosovës dhe BE-së, duke bërë të qartë se do të vazhdojë të monitorojë nga afër zhvillimet.

/rtsh.al/