Bletaria është i vetmi sektor që ka qëndrueshmëri dhe zhvillim në bashkinë e Librazhdit.

Të dhënat nga Drejtoria e Bujqësisë në këtë bashki flasin për dhjetëra bletërritës që administrojnë parqe të mëdha e qindra të tjerë më të vegjël.

“Aktualisht fermerët aktivë që konkurrojnë në skemat përfituese janë me 30–40 koshere, ndërsa fermerët që kanë 5–15 koshere janë më në shumicë, rreth 500–600,” tregon Hysni Hoxha nga Drejtoria e Bujqësisë dhe Turizmit.

Ky vit ka qenë i mbarë për bletarinë dhe Hoxha shton se të gjithë fermerët raportojnë për më shumë mjaltë të prodhuar me cilësi shumë të mirë.

Mjalti i Librazhdit, qoftë ai i gështenjave, i luleve apo i pishës, tregun e ka të sigurt.

“Normalisht fermerët kanë klientelën e vet ku tregtojnë. Nuk është se u ngelet mjaltë. Sidomos mjalti i gështenjës në zonën e Gurakuqit, por edhe mjalti i luleve, si ai i Sopotit,” thotë z. Hoxha.

Bletaria në zonën e Librazhdit është një traditë e hershme, e cila po merr zhvillim jo vetëm për shkak të mjedisit të përshtatshëm me pyje, male e kullota për t’u zhvilluar, por edhe për shkak të politikave mbështetëse zhvilluese ndaj këtij sektori.

/rtsh.al/