Procesi i shit-blerjes së një automjeti për pak sa nuk përfundoi në vrasje. Kjo është ajo çka ndodhi në Kamëz, aty ku Doaldo Bajrami 24-vjeç i shiti Elvis Vishës, po 24-vjeç automjetin e tij, por që Visha nuk pranonte që të firmoste dokumentet përkatës përballë një noteri.

Sorollatja e Bajramit për disa ditë, i humbi durimin këtij të fundit, i cili përballë kundërshtive të blerësit të mjetit të tij, mori një armë gjahu dhe e qëlloi në krah.

Visha u dërgua menjëherë në spital dhe është jashtë rrezikut për jetën, ndërsa Bajrami u arrestua.

Policia zbardhi dinamikën, ku vuri në pranga autorin por është në kërkim të armës së zjarrit.

Elvis Visha njihet si përdorues i lëndëve narkotike dhe Doaldo Bajrami kishte frikë se mos bënte ndonjë aksident dhe nuk donte që automjetin e blerë ta kishte në pronësi të tij.

Visha i kishte thënë Bajramit se automjetin e ka shitur te një person tjetër. Por autori i dyshuar e kishte parë duke qarkulluar me mjet.

Gazetare: Flutura Tota

/rtsh.al/