Bordi i Transparencës dhe Kufizimit të Përkohshëm të Çmimeve të Tregtimit me Shumicë/Pakicë të Nënprodukteve të Naftës dhe të Gazit ka zhvilluar mbledhjen e tij ku ka përcaktuar tavanet zyrtare të çmimeve të karburanteve për tregun vendas.

Sipas Bordit të Transparencës, vendimi vjen në mbështetje të Vendimit të Këshillit të Ministrave “për shpalljen e situatës së veçantë në tregun e hidrokarbureve”, në zbatim të ligjit nr. 8450 “Për përpunimin, transportimin dhe tregtimin e naftës, të gazit dhe nënprodukteve të tyre”, si dhe Aktit Normativ të datës 3.4.2026.

Në përfundim të mbledhjes së datës 19 Shtator 2026, Bordi vendosi kufijtë maksimalë të shitjes si më poshtë: Gazoili (SSH EN 590): Çmimi tavan i shitjes me pakicë caktohet 219 lekë/litër, ndërsa për shitjen me shumicë jo më shumë se 207 lekë/litër.

Benzina (SSH EN): Çmimi tavan i shitjes me pakicë caktohet 195 lekë/litër, ndërsa për shitjen me shumicë jo më shumë se 183 lekë/litër.

Çmimet e reja hyjnë në fuqi ditën e sotme, në orën 16:00, dhe do të mbesin të vlefshme deri në mbledhjen e radhës të Bordit, ku do të pasqyrohen lëvizjet e ardhshme të tregut.

Paralajmërohen operatorët: Shkelësve u pezullohet aktiviteti

Bordi i Transparencës u ka bërë thirrje të gjithë operatorëve të tregtimit me shumicë dhe pakicë që të zbatojnë me rigorozitet tavanet e caktuara, në të kundërt ndaj çdo subjekti që do të konstatohet në shkelje të këtij vendimi do të merret masa e menjëhershme e pezullimit të aktivitetit.

Ndërkaq, në një deklaratë të përbashkët, Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë konfirmuan angazhimin e tyre të plotë për mbrojtjen e interesave të konsumatorëve shqiptarë dhe garantimin e konkurrencës së ndershme në tregun e hidrokarbureve.

Njoftimi i plotë:

Bordi i Transparencës dhe Kufizimit të Përkohshëm të çmimeve të tregtimit me shumicë/pakicë të nënprodukteve të naftës dhe të gazit, në mbështetje të Vendimit të Këshillit të Ministrave nr. 711, datë 16.09.2026 “Për shpalljen e situatës së veçantë në tregun e hidrokarbureve”, në zbatim të nenit 21/3 dhe nenit 21/5 të Ligjit 8450, datë 24.2.1999 “Për përpunimin, transportimin dhe tregtimin e naftës, të gazit dhe nënprodukteve të tyre”, të ndryshuar, si dhe të Aktit Normativ nr. 1, Datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, zhvilloi mbledhjen e parë.

Kështu  Bordi i Transparencës në datë 19 Shtator 2026, vendosi:

✅Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 219 lekë/litri, ndërsa i shitjes me shumicë jo më shumë se  207 lekë/litër.

✅Çmimi i shitjes me pakicë i nënproduktit benzinë e standardit SSH EN të jetë jo më shumë se 195 lekë/litri, ndërsa i shitjes me shumicë jo më shumë se  183 lekë/litër.

🗓️Çmimet e caktuara nga Bordi do të hynë në fuqi sot datë 19 ora   16.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.

⚠️Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi.

🚫Në rast të shkeljeve të konstatuara nga operatorë të ndryshëm do të vendoset pezullimi i aktivitetit.

🛢️ Ministria e Ekonomisë dhe Inovacionit sëbashku me Ministrinë e Financave dhe Ministrinë e Infrastrukturës dhe Energjisë janë angazhuar të mbrojnë interesat e konsumatorëve shqiptarë dhe ruajtjes së parimeve të konkurrencës së ndershme në treg.