Botafogo ka shkarkuar trajnerin Renato Paiva. Vendimi u mor nga pronari i klubit kampion të Amerikës së Jugut, sipërmarrësi amerikan John Textor, i cili ishte i pakënaqur me performancën e ekipit në Kupën e Botës për Klube.

Emri i Davide Ancelottit, ndihmësi aktual i babait të tij, trajneri i ri i Seleçaos, tani po qarkullon me forcë si zgjedhja e pasardhësit të Paiva. Me sa duket ka pasur kontakt midis palëve, dhe tani Botafogo do ta diskutojë atë me CBF-në, Federatën Braziliane të Futbollit, sepse beson se është e mundur që Ancelotti junior të kryejë të dy rolet: trajner i ‘Fogao’ dhe ‘ndihmës’ i ekipit kombëtar.

Në mbështetje të tezës së tij, klubi Carioca kujton se deri pak ditë më parë Taffarel ishte trajneri i portierëve si për Liverpoolin ashtu edhe për ekipin kombëtar, ndërsa Rodrigo Lasmar është ende mjek si për Atletico Mineiron ashtu edhe për Seleçaon.

Pra, Botafogo beson se roli i dyfishtë është i mundur, mbetet për t’u parë se çfarë mendon Davide Ancelotti, i cili deri më tani, te Bayern, Napoli, Everton dhe Real Madrid, ka qenë gjithmonë asistent i babait të tij Carlo dhe së fundmi tha se dëshiron të përqendrohet te Seleçao dhe ëndrra për të fituar Kupën e Botës të ardhshme.

Ajo që është e sigurt është se Botafogo ka nevojë për një trajner të ri së shpejti, duke qenë se të shtunën e ardhshme do të rikthehet në fushë për derbin e Rios kundër Vasco da Gama, i vlefshëm për javën e 13-të të ‘Brasilerao’.