Kryeprokurori i Posaçëm i Shqipërisë, Altin Dumani, zhvilloi një vizitë dyditore në Bruksel, duke u takuar me zyrtarë të lartë të Komisionit Evropian dhe agjencive kryesore të BE-së. Takimet dëshmuan vlerësimin e lartë të Bashkimit Evropian për progresin dhe qëndrueshmërinë e Prokurorisë së Posaçme (SPAK) në luftën kundër krimit të organizuar dhe korrupsionit të nivelit të lartë.

Gjatë qëndrimit, Kryeprokurori Dumani takoi Drejtorin e Përgjithshëm të DG NEAR, Gert Jan Koopman; Drejtoreshën në detyrë të Përgjithshme në OLAF (Zyra Evropiane Kundër Mashtrimit), Salla Saastamoinen; Zëvendësdrejtoreshën e Përgjithshme të DG JUST, Irena Moozová, dhe shefat e kabineteve të Komisionerëve për Zgjerimin dhe Punët e Brendshme.

Në njoftimin për shtyp të publikuar nga zyra e BE-së në Tiranë rreth këtyre takimeve, bëhet e ditur se të gjithë bashkëbiseduesit theksuan vlerësimin e tyre për “forcën, qëndrueshmërinë dhe besueshmërinë” e SPAK-ut, si dhe bashkëpunimin e ngushtë me agjencitë e BE-së dhe partnerët ndërkombëtarë.

Ambasadori i BE-së, Silvio Gonzato, e cilësoi Bashkimin Evropian si një “mbështetës të fortë” të SPAK-ut dhe theksoi rëndësinë kritike të punës së tij.

“Ruajtja e rezultateve solide të SPAK-ut edhe nën drejtimin e tij të ri në vitin 2026 e më tej do të jetë kyçe për vazhdimin e progresit të Shqipërisë drejt anëtarësimit në BE,” deklaroi ambasadori Gonzato.

Ai shtoi se kjo është thelbësore si për sigurinë e Shqipërisë, ashtu edhe për atë të BE-së, dhe për forcimin e sundimit të ligjit në vend.

Deklarata e Ambasadorit Gonzato përfshiu edhe një thirrje të qartë edhe për institucionet e tjera shqiptare.

“SPAK-u nuk mund ta bëjë këtë i vetëm. Edhe institucionet e tjera shqiptare duhet të bëjnë pjesën e tyre,” ishte mesazhi i BE-së, duke theksuar nevojën për bashkërendim dhe mbështetje institucionale për punën e Prokurorisë së Posaçme në funksion të agjendës së integrimit evropian.

Vizita e Kryeprokurorit Dumani thekson vendosmërinë e SPAK-ut për të avancuar reformat në drejtësi dhe për të forcuar bashkëpunimin ndërkombëtar, dy elemente kyçe të kërkuara nga Brukseli.

/rtsh.al/