19 gushti shënon Ditën Botërore të Fotografisë. Shkodra ka një traditë të hershme në këtë fushë, me fotografë dhe familje të njohura që ndër vite kanë dokumentuar jetën dhe historinë e qytetit.

“Unë e kam filluar i ri zanatin e fotografisë të cilën e vazhdoj edhe sot. Unë e kam trashëguar prej babës i cili ka punuar nga viti 1930 deri në vitin 1973. Mandej në vitin 1974 e kam filluar unë të cilën këtë zanat, këtë profesion e vazhdoj edhe sot. Njëkohësisht e vazhdon të disa vite e ushtron edhe djali im”, tha fotografi Nikolin Jakova.

Tradita e fotografisë në Shkodër po përcillet edhe te brezi i ri. Fotografi Edi Duoda vlerëson interesin e të rinjve për fotografinë dhe vazhdimësinë e kësaj tradite.

“Sidomos për pjesën e fotografisë mendoj që ka shumë interes. Është e diçka vizive, është diçka e bukur. Lidhet edhe sot sidomos me pjesën e rrjeteve sociale me çdo gjë”, tha fotografi Edi Duoda.

Sipas Rozafa Shpuzës, Shkodra duhet të bëjë më shumë për promovimin e fotografisë.

“Shkodra ka nevojë për një festival ndërkombëtar fotografie. Pse jo, Shkodra me u bë stacioni ku me ardhur artistë fotografë prej tanë botët edhe ne jemi qyteti i Marubit edhe ne duhet me e pas patjetër këtë event”, tha ajo.

Megjithëse Shkodra ka një histori të pasur në fushën e fotografisë, 19 gushti kaloi në heshtje në qytet, pa aktivitete të veçanta kushtuar kësaj dite.

Gazetar: M. Gjini

/rtsh.al/