Policia turke mbylli të martën sheshin qendror të Stambollit për të parandaluar çdo protestë të paralajmëruar për Ditën e Punëtorëve, ndërkohë që rreth tij janë ngritur barriera të larta metalike.

Ministri i Brendshëm Ali Jerlikaja tha se autoritetet kishin caktuar 40 zona për festimet e Ditës së 1  Majit, me përjashtim të sheshit emblematik “Taksim”. Ministri shtoi se disa sindikata kishin kërkuar përdorimin e sheshit, që ka qenë edhe epiqendra e protestave të vitit 2013 kundër qeverisë së presidentit Rexhep Tajip Erdogan, por këtë vit askush nuk do të lejohej. “Sheshi Taksim dhe rrethina e tij nuk mund të shfrytëzohen për asnjë  lloj tubimi”, – u shpreh ai.  

Partia kryesore opozitare e Turqisë, e cila doli fituese në zgjedhjet vendore të 31 marsit, i bëri presion qeverisë që të hapte sheshin për mitingjet e punëtorëve. Kreu i Partisë Popullore Republikane i bëri thirrje ministrit të Brendshëm që të rishqyrtojë vendimin për  mbylljen e sheshit “Taksim”, i cili në të kaluarën është përdorur për protesta. 

Ndërkohë organizata e të drejtave të njeriut Amnesty International bëri thirrje që sheshi kryesor i Stambollit të hapet për tubime. Duke e quajtur atë zonë si një vend me rëndësi të madhe, Amnesty theksoi se për më shumë se një dekadë, autoritetet turke kanë kufizuar në mënyrë të paligjshme të drejtën e njerëzve për t’u grumbulluar ndërsa kanë kriminalizuar edhe protestat paqësore.  

Më shumë se 42 mijë policë janë në detyrë në Stamboll më 1 Maj.

Gazetare Vjollca Zharri

/ rtsh.al /