Dita e “Shën Kozmait” mblodhi bashkë mjaft besimtarë.

Në Manastirin e “Shën Marisë” në Kolkondas, ku gjendet kisha që mban emrin e shenjtorit, u mbajt liturgjia e shenjtë.

Kryepeshkopi i Tiranës, Durrësit dhe gjithë Shqipërisë, Imzot Joani, foli për rëndësinë e kësaj dite.

“Drita e tyre ishte shumë e nevojshme në atë periudhë, sepse në gjithë Ballkanin kishte një lloj errësire shpirtërore për arsye të shumta historike. Shën Kozmai, në shembullin e apostujve, kërkoi që të përhapte dritë dhe çdo njeri që përpiqet me zell të madh pa dyshim që e bën atë. Të dëshmojnë me jetën dhe veprat e tyre se është shumë e realizueshme që njeriu të jetojë sipas mësimeve të Ungjillit,” tha Kryepeshkopi Joani.

Në vendin ku gjendet një kopje e afreskut të murgut Kozma, u mblodhën shumë besimtarë.

Besimtarët dhe banorët e zonës prej disa ditësh e kanë frekuentuar manastirin si një vend pelegrinazhi, reflektimi dhe shprese.

Si një nga thesaret e çmuara të trashëgimisë sonë kulturore, manastiri mendohet të jetë ndërtuar nga banorët e zonës me kontributin financiar të Ali Pashë Tepelenës.

Në të ndodhen dy kisha: Shën Maria (kisha më e vjetër) dhe kisha e Shën Kozmait. Sot, manastiri është një atraksion shpirtëror i vizituar mjaft nga vendasit dhe të huajt.

/rtsh.al/