Kryeministri i Shqipërisë, Edi Rama, gjatë podcastit “Flasim”, komentoi miratimin në Kuvendi i Shqipërisë të një rezolute të lidhur me procesin e anëtarësimit të Shqipërisë në Bashkimin Evropian, ku opozita dhe shumica qeverisëse votuan së bashku.

Rama e cilësoi këtë zhvillim si pozitiv dhe të mirëpritur, duke theksuar se bashkimi i forcave politike për çështjen evropiane duhet të ndodhë vazhdimisht.

Sipas kryeministrit, së shpejti pritet një tjetër lajm pozitiv në kuadër të negociatave me Bashkimi Evropian, që lidhet me hapjen e kapitujve të rinj dhe kalimin në fazën tjetër të procesit, duke hapur rrugën edhe për mbylljen e kapitujve të negociatave.

“Shënimi i fundit është për diçka të mirëseardhur në Kuvendin e Shqipërisë, ku befasisht, por e përsëris pozitivisht, forcat opozitare të Kuvendit të Shqipërisë u bashkuan me shumicën qeverisëse për një rezolutë të lidhur me anëtarësimin në Bashkimin Evropian. Më vjen mirë realisht që ndodhi diçka e tillë. Do të ishte mirë të ndodhte vazhdimisht kur flasim për anëtarësimin në Bashkimin Europian, por edhe një herë e vetme, prapë se prapë, është një herë me vlerën e vet dhe më vjen mirë po ashtu që, me sa unë kuptoj, e kanë kuptuar që procesi është i pandalshëm, që bllokimi i shumëpërfolur nuk ekziston, që së shpejti do të vijë edhe lajmi i ri dhe i mirë, si të gjitha lajmet për hapjen e kapitujve, të kapërcimit në fazën tjetër të procesit dhe do të hapet edhe rruga për fillimin e mbylljes së kapitujve të negociatave. Kështu që bashkimi, sado i befasishëm dhe sado i ngutur në “varkën e Shqipërisë europiane”, ku ne jemi aty prej kohësh dhe ku vendin e kanë gjithmonë aty, është plotësisht i mirëseardhur”, tha kryeministri Rama.

/rtsh.al/