Kryeministri i Shqipërisë, Edi Rama, ka qenë sot pjesë e një prej forumeve më të rëndësishme strategjike që po zhvillohet në kryeqytetin austriak, Vjenë.

Bëhet fjalë për konferencën “Time To Decide Europe 2025” (Koha për të vendosur për Evropën 2025), një platformë e nivelit të lartë që ka bërë bashkë liderë politikë, diplomatë të karrierës, si dhe ekspertë të njohur të ekonomisë dhe sigurisë globale.

Lajmin e ka bërë të ditur vetë kreu i qeverisë përmes një postimi në rrjetet sociale, ku ka ndarë detaje mbi pjesëmarrjen e tij. Rama theksoi se në këtë organizim ishte i ftuar të nderi, duke luajtur një rol aktiv në moderimin e diskutimeve.

“Ishte privilegj të merrja pjesë si i ftuar nderi në drejtimin e njërit prej paneleve, si edhe në konkluzionet përfundimtare,” shkruan Rama në reagimin e tij.

Fokusi i konferencës

Forumi “Time To Decide Europe 2025” vjen në një moment kritik për kontinentin, duke trajtuar tema kyçe që lidhen me sfidat e së ardhmes, sigurinë gjeopolitike dhe drejtimin ekonomik që duhet të marrë Bashkimi Evropian dhe vendet partnere në vitet në vijim.

Pjesëmarrja e kryeministrit Rama në panelet përmbyllëse thekson vëmendjen që po i kushtohet rajonit të Ballkanit Perëndimor në arkitekturën e re të sigurisë dhe politikës evropiane.

/rtsh.al/