Kryeministri britanik, Sir Keir Starmer, ka mbërritur në Johanesburg të Afrikës së Jugut për të marrë pjesë në samitin vjetor të G20-ës, ku mblidhen liderët e 20 ekonomive më të mëdha të botës. Samiti këtë vit do të zhvillohet pa pjesëmarrjen e Donald Trump, i cili ka refuzuar të marrë pjesë duke u mbështetur në pretendime se njerëzit e bardhë po persekutohen në Afrikën e Jugut.

Starmer, pritet të theksojë rëndësinë e rolit të tij si ambasador ekonomik për Mbretërinë e Bashkuar. Përpara nisjes së punimeve të samitit, ai do të vizitojë një depo hekurudhore në Johanesburg për të parë trenat e prodhuar në Derby dhe për të njoftuar një marrëveshje të re për të ofruar “këshilla strategjike dhe shërbime konsulence” për hekurudhat e Afrikës së Jugut.

Gjatë udhëtimit, Starmer tha se fokusi i tij do të jetë sigurimi i marrëveshjeve që sjellin përfitime të prekshme në Mbretërinë e Bashkuar. Ai theksoi se investimet nga aleatët e G20 janë thelbësore për rritjen e vendeve të punës dhe përballimin e kostos së jetesës.

Ndërkohë, Donald Trump e ka cilësuar G20-në si një “turp të plotë”, duke përsëritur pretendimin e tij se afrikano jugorët e bardhë po persekutohen, një pretendim i mohuar nga të gjitha partitë politike në Afrikën e Jugut, përfshirë ato që përfaqësojnë komunitetin e bardhë. Administrata Trump ka ofruar status refugjati për këtë grup dhe i ka vendosur ata në përparësi.

Presidenti i Afrikës së Jugut, Cyril Ramaphosa, komentoi se mungesa e SHBA-së në G20 është “humbja e tyre”, duke shtuar se “politika e bojkotit nuk funksionon”.