Gjykata e Posaçme e Shkallës së Parë për Korrupsionin dhe Krimin e Organizuar ka dhënë vendimin për çështjen penale ndaj shtetasit Denis Xholi, i cili akuzohej për korrupsion në prokurimet publike.

Në përfundim të gjykimit të zhvilluar me rregullat e zakonshme, trupi gjykues i përbërë nga gjyqtarët Etleva Deda, Elsa Ulliri dhe Bib Ndreca, vendosi dënim me burg dhe heqje të së drejtës për funksione publike

Denis Xholi u deklarua fajtor për veprën penale “Shkelja e barazisë së pjesëmarrësve në tendera apo ankande publike”, e kryer në bashkëpunim. Ai u dënua me 1 vit e 6 muaj burgim.

Gjithashtu, në zbatim të nenit 35 të Kodit Penal, gjykata i hoqi të drejtën për të ushtruar funksione publike për 5 vjet.

Vuajtja e dënimit për Xholin do të kryhet në një nga institucionet për të dënuarit e rritur dhe të sigurisë së zakonshme.

Akuzat nga SPAK

Çështja penale ndaj Xholit, e cila i përkiste procedimit penal vitit 2022, ishte ngritur nga Prokuroria e Posaçme kundër Korrupsionit dhe Krimit të Organizuar (SPAK). Akuza specifike lidhej me manipulimin e procedurave të prokurimit publik, duke shkelur parimin e barazisë ndërmjet pjesëmarrësve.

Vendimi i Gjykatës së Posaçme është i apelueshëm. Sipas njoftimit, kundër këtij vendimi lejohet apel brenda afatit ligjor, në Gjykatën e Posaçme të Apelit për Korrupsionin dhe Krimit të Organizuar.

Xholi i dënuar edhe për korrupsion në zgjedhje

Gjykata e Posaçme e Shkallës së Parë për Korrupsionin dhe Krimin e Organizuar (SPAK) e ka dënuar Xholin edhe për çështjen e bujshme të dyshimeve për korrupsion gjatë zgjedhjeve të vitit 2021 në Dibër. Gjykata dënoi me nga 1 vit burgim shtetasit Denis Xholi dhe Albjon Çeku.

Dy të pandehurit u arrestuan më 22 prill të vitit 2021 në Dibër, pasi u kapën me shuma monetare dhe materiale që dyshoheshin se shërbenin për blerje votash. Arrestimi i tyre erdhi pas një përplasjeje në qytetin e Dibrës, ku Xholi dhe Çeku u kapën nga kandidati i Partisë Demokratike, Luan Haka, dhe mbështetës të PD-së.

Policia konfirmoi asokohe se në automjetin e tyre u sekuestrua “një shumë lekësh, modelar për të orientuar zgjedhësit për mënyrën e votimit si dhe fletëpalosje të një subjekti politik”.

Menjëherë pas ngjarjes, Drejtuesi Politik i PD në Dibër, Xhelal Mziu, pretendoi publikisht se paratë po shpërndaheshin për të siguruar vota për kandidatin e Partisë Socialiste, Melaim Damzi, pretendim ky që u përgënjeshtrua nga Shtabi Elektoral i PS Dibër.

/rtsh.al/