Gjykata e Posaçme e Shkallës së Parë për Korrupsionin dhe Krimin e Organizuar ka vendosur të dërgojë për gjykim çështjen penale në ngarkim të pesë shtetasve, të akuzuar për pjesëmarrje në grup të strukturuar kriminal dhe trafikim të narkotikëve.

Në seancën paraprake të zhvilluar më 1 qershor 2026, nën drejtimin e gjyqtares Olkeda Lice, u shqyrtuan pretendimet e palëve lidhur me dosjen e ardhur nga Prokuroria e Posaçme (SPAK) në tetor të vitit 2023. Procedimi penal nr. 36/2, i vitit 2019 (referuar procedimit nr. 238 të vitit 2017), është finalizuar me vendimin nr. 10/29/17/99, i cili i hap rrugën gjykimit në themel të çështjes.

Të pandehurit dhe akuzat

Në përfundim të seancës, gjykata vendosi dërgimin për gjykim për shtetasit:

Erjon Hoxhara, i cili akuzohet për “Trafikim të narkotikëve” në bashkëpunim në kuadër të grupit të strukturuar kriminal, “Grup i strukturuar kriminal” dhe “Kryerje e veprave penale nga organizata kriminale dhe grupi i strukturuar kriminal”.

Eltion Bregasi, akuzohet për të njëjtat vepra penale si shtetasi Hoxhara, të parashikuara nga nenet 283/a/1, 28/4, 333/a/2 dhe 334/1 të Kodit Penal.

Mariglen Shusha, Donial Drolli dhe Elton Hamza, përballen me një gamë më të gjerë akuzash, që përfshijnë “Kultivim të bimëve narkotike”, “Trafikim të narkotikëve” (në bashkëpunim dhe në formën e tentativës), si dhe pjesëmarrje në grup të strukturuar kriminal.

Gjykata ka urdhëruar formimin e fashikullit të gjykimit, i cili do të përmbajë të gjitha aktet e hetimeve paraprake dhe zhvillimet e seancës paraprake. Dokumentacioni përkatës duhet të depozitohet në sekretarinë e Gjykatës së Posaçme brenda një afati 10-ditor nga data e shpalljes së vendimit.

Ky vendim është i formës së prerë dhe kundër tij nuk lejohet e drejta e ankimit. Ndërkohë, mbrojtësit e caktuar kryesisht nga gjykata do të përfitojnë shpërblimin përkatës nga shteti, sipas tarifave ligjore në fuqi.

Çështja kalon tashmë për gjykim në themel, ku do të shqyrtohet prova dhe përgjegjësia penale e secilit prej të pandehurve.

/rtsh.al/