Beteja e midis Holandës dhe Ekuadorit, dy skuadrave që e patën nisur grupin A me nga një fitore në ndeshjet e para, që u luajt të premten në mbrëmje dhe u soll për sportdashësit drejtpërdrejt nga RTSH Sport, është mbyllur në barazim 1-1. Në fakt, kanë qenë portokallinjtë që kanë kaluar të parët në epërsi pas vetëm 6 minutash lojë.

Goli duket se i ka bërë holandezët të mendojnë më tepër për ta mbrojtur epërsinë, por e gjejnë veten nën trysninë e vazhdueshme të amerikanolatinëve, të cilët nuk rreshtin së ndërtuari aksione dhe raste për shënim. Por ca për pasaktësi në finalizim dhe sidomos për meritë të portierit holandez, Nopert, goli i barazimit nuk ka ardhur për ekuadorianët. Edhe kur ka ardhur, 4 minuta para fundit të pjesës së parë, me autor Estupinanin, ai është anuluar për pozicion jashtëloje.  

Por Ekuadori do ta gjejë golin e barazimit me fillimin e pjesës së dytë, me autor të përhershmin Ener Valencian, që realizon në minutën e 49-të.

41 minutat e mbetura të kohës së rregullt dhe ato shtesë nuk sjellin gola të tjerë dhe Holanda dhe Ekuadori e mbyllin në barazim 1-1, duke ndarë nga një pikë që i mban të dyja në krye të renditjes së grupit A.