Organizata mbikëqyrëse bërthamore e OKB-së tha se kishte tërhequr inspektorët e fundit të mbetur nga Irani, ndërsa e kanë ndaluar të kthehen në objektet bërthamore të vendit të bombarduara nga Shtetet e Bashkuara dhe Izraeli.

Inspektorët e Agjencisë Ndërkombëtare të Energjisë Atomike nuk kanë qenë në gjendje të inspektojnë objektet e Iranit që prej luftës 12 ditore mes Izraelit dhe Iranit edhe pse kreu i IAEA-së, Rafael Grossi, ka thënë se inspektimi është prioriteti i tij kryesor.

Ndërkohë Parlamenti i Iranit ka miratuar ligjin për pezullimin e bashkëpunimin me IAEA-në derisa të garantohet siguria e objekteve të saj bërthamore.

Nga ana e saj, IAEA thotë se Irani ende nuk e ka informuar zyrtarisht për ndonjë pezullim dhe mbetet e paqartë se kur inspektorët e agjencisë do të jenë në gjendje të kthehen në Iran.

“Një ekip inspektorësh të IAEA-s sot (e premte, sipas orës lokale) u nis në mënyrë të sigurt nga Irani për t’u kthyer në selinë e Agjencisë në Vjenë, pasi qëndruan në Teheran gjatë gjithë konfliktit të fundit ushtarak”, tha IAEA në X.

Diplomatët thanë se numri i inspektorëve të IAEA-s në Iran u zvogëlua në një grusht pas fillimit të luftës më 13 qershor.

Gjithashtu, disa prej tyre kanë shprehur shqetësim për sigurinë e inspektorëve që nga fundi i konfliktit, duke pasur parasysh kritikat e ashpra ndaj agjencisë nga zyrtarët iranianë dhe mediat iraniane.

Irani e ka akuzuar agjencinë se në mënyrë efektive ka hapur rrugën për bombardimet duke lëshuar edhe raportin më 31 maj që çoi në një rezolutë nga Bordi i Guvernatorëve prej 35 vendesh i IAEA-s duke deklaruar se Irani ka shkelur detyrimet e tij.

Shefi i IAEA-s, Rafael Grossi, ka thënë se i qëndron raportit ndërsa mohon se ai ka ofruar mbulim diplomatik për veprime ushtarake.

/rtsh.al/