India ka shpalosur sot planin e saj më ambicioz buxhetor në histori, duke sinjalizuar një kthesë drastike drejt forcimit ushtarak dhe pavarësisë ekonomike.

Ministrja e Financave, Nirmala Sitharaman, prezantoi para parlamentit një paketë masive që parashikon shpenzime rekord: 133 miliardë dollarë për infrastrukturën dhe 85 miliardë dollarë për mbrojtjen. Kjo përkthehet në një rritje prej 9% dhe 15% respektivisht, krahasuar me vitin e kaluar.

Rritja e ndjeshme e buxhetit të mbrojtjes vjen si një reagim i drejtpërdrejtë ndaj konfliktit katër-ditor me Pakistanin. Gjatë atij konfrontimi, të dyja fuqitë bërthamore përdorën gjerësisht dronë, artileri të rëndë dhe breshëri raketash.

Ministri i Mbrojtjes, Rajnath Singh, e quajti rritjen “të paprecedentë”. “Është në interesin më të mirë të kombit,” tha ai, duke saktësuar se fondet do të shkojnë për blerjen e avionëve të ri luftarakë, dronëve, nëndetëseve dhe anijeve.

Sfidimi i sanksioneve amerikane

Ky buxhet merr një rëndësi të veçantë gjeopolitike, pasi është i pari që prezantohet pas vendosjes së tarifave ndëshkuese prej 50% nga Presidenti i SHBA-së, Donald Trump, në gusht. Uashingtoni ndërmori këtë hap si ndëshkim për vazhdimin e blerjes së naftës ruse nga Nju Delhi.

Në këtë klimë, Kryeministri Narendra Modi theksoi se India nuk kënaqet thjesht me statusin e ekonomisë me rritjen më të shpejtë.

“India dëshiron të bëhet ekonomia e tretë më e madhe në botë. Ky buxhet paraqet një plan për t’i dhënë vrull prodhimit vendas dhe vetëmbështetjes,” deklaroi Modi.

/rtsh.al/