Tensionet në Lindjen e Mesme kanë arritur një pikë të re kritike pas refuzimit zyrtar të Iranit ndaj propozimit prej 15 pikash të Shteteve të Bashkuara për armëpushim. Ndërkohë që diplomacia dështon, sulmet ajrore mbi qendrat strategjike petrokimike në Iran dhe goditjet me raketa në qytetet izraelite kanë shënuar viktima të reja dhe dëme të larta infrastrukturore.

Diplomacia në qorrsokak

Zëdhënësi i Ministrisë së Jashtme iraniane, Esmail Baghaei, deklaroi përmes agjencisë shtetërore të lajmeve IRNA, se plani amerikan i përcjellë përmes ndërmjetësve është “plotësisht i papranueshëm”. Sipas Teheranit, nuk mund të ketë negociata të mirëfillta për sa kohë ato shoqërohen me ultimatume dhe kërcënime për krime lufte.

“Irani ka hartuar kërkesat e veta, të bazuara në interesat tona kombëtare dhe konsideratat e sigurisë,” pohoi Baghaei, duke sinjalizuar se një marrëveshje mbetet larg realitetit.

Goditje mbi infrastrukturën energjetike

Në terren, lufta ka hyrë në javën e pestë me një përshkallëzim të sulmeve ndaj objekteve jetike. Kompleksi petrokimik South Pars në Asaluyeh, pika më e madhe e këtij lloji në Iran, u godit nga një operacion i përbashkët ajror i forcave amerikane dhe izraelite. Agjencia e lajmeve Fars raportoi shpërthime të fuqishme në zonë, ndërsa Ministri izraelit i Mbrojtjes, Katz, konfirmoi objektivin duke e cilësuar atë si një goditje ndaj “motorit ekonomik të regjimit”.

Nga ana tjetër, Presidenti i Këshillit Evropian, Costa, reagoi ashpër në rrjetet sociale duke i cilësuar sulmet ndaj infrastrukturës civile dhe energjetike si “të paligjshme dhe të papranueshme”, duke bërë thirrje për një zgjidhje urgjente diplomatike.

Tragjedia në Haifa

Përveç dëmeve materiale, kostoja njerëzore vazhdon të rritet. Në Haifa, numri i të vdekurve nga sulmi iranian i një dite më parë ka shkuar në katër. Ekipet e shpëtimit nxorrën sot nga rrënojat trupat e një djali 40-vjeçar dhe partneres së tij 35-vjeçare, të cilët ishin strehuar në shkallët e ndërtesës. Një ditë më parë, prindërit e 40-vjeçarit, një çift i moshuar, u gjetën gjithashtu pa jetë nën rrënojat e shtëpisë së tyre.

/rtsh.al/