Iranianët pritet t’i japin lamtumirën e fundit Udhëheqësit Suprem të ndjerë, Ali Khamenei, në një ceremoni mortore tre-ditore që do të mbahet në kryeqytetin iranian.

Sipas mediave shtetërore iraniane, homazhet do të zhvillohen në kompleksin e madh të lutjeve në Teheran, ku mijëra mbështetës pritet të mblidhen për të nderuar figurën që drejtoi vendin për dekada me radhë. Procesioni i varrimit do të njoftohet pas përfundimit të ceremonive përkujtimore.

Vrasja e Khameneit, 86 vjeç, raportohet se ndodhi gjatë sulmeve të koordinuara amerikano-izraelite ndaj objektivave në Teheran. Sipas burimeve ushtarake izraelite, në sulme humbën jetën edhe disa anëtarë të lartë të sigurisë iraniane, si dhe persona nga rrethi i tij i afërt.

Ngjarja shënon një përshkallëzim të paprecedentë të tensioneve në Lindjen e Mesme. Sulmet, të cilat thuhet se u mbështetën nga inteligjenca amerikane dhe izraelite, kanë shtuar frikën për destabilizim të mëtejshëm në rajon.

Ndërkohë, Ministri i Mbrojtjes i Izraelit, Israel Katz, deklaroi se çdo udhëheqës iranian që do të zgjidhet për të pasuar Khamenein dhe që do të vazhdojë politikat armiqësore ndaj Izraelit dhe aleatëve të tij, do të konsiderohet objektiv i mundshëm ushtarak.

/rtsh.al/