Pika e Kalimit Kufitar Kapshticë do të ndërpresë përkohësisht funksionimin të hënën, më 27 korrik, për shkak të grevës së punonjësve të doganës greke.

Autoritetet shqiptare bëjnë me dije se ndërprerja e përkohshme e qarkullimit vjen pas njoftimit të autoriteteve doganore greke për zhvillimin e grevës, e cila do të ndikojë në funksionimin normal të pikës kufitare.

Drejtoria e Përgjithshme e Doganave u bën thirrje qytetarëve dhe bizneseve që planifikojnë të udhëtojnë drejt Greqisë ose nga Greqia në drejtim të Shqipërisë, të shmangin kalimin nëpërmjet Pikës së Kalimit Kufitar Kapshticë gjatë intervalit 05:00–10:00 të ditës së hënë, 27 korrik, dhe të planifikojnë udhëtimet e tyre jashtë këtij orari për të shmangur vonesat.

Ndërkohë fluksi i mjeteve gjatë ditës së sotme në këtë pikë të kalimit kufitar ka qenë normal, ndërsa nuk janë regjistruar radhë e pritje të gjata të qytetarëve në palën shqiptare.

Sipas burimeve zyrtare nga Drejtoria e Kufirit dhe Migracionit në Korçë gjatë 24 orëve të kaluara në Kapshticë ka patur në hyrje 3939 shtetas me 1259 mjete dhe 2904 shtetas në dalje me 987 mjete.

Gazetare: K. Koçi

/rtsh.al/