Kanë përfunduar 3 ndeshjet e ditës së sotme të javës së 17-të të Kategorisë së Parë, të cilat kanë dhuruar rezultate shumë interesante.

Laçi merr një fitore të çmuar 2-0 në Fier përballë vendasve të Apolonisë dhe ruan vendin e dytë në klasifikim. Traore në pjesën e parë dhe Kalaj në të dytën kanë shënuar për kurbinasit, që tashmë ngjiten në kuotën e 33 pikëve në renditje.

Edhe Pogradeci ruan hapin e Laçit dhe merr një fitore të rëndësishme 3-2 në Gjirokastër përballë Luftëtarit vendas. Gjirokastritët shënojnë të parët, por liqenorët reagojnë duke shënuar 3 gola me Grecën dhe Kazeem (2 gola). Sfida ka qenë e tensionuar dhe ka patur nga një karton të kuq për secilën skuadër.

Kastrioti ka mposhtur 2-1 Lushnjën, ndërsa sfida Korabi-Burreli nuk është zhvilluar për shkak të kushteve atmosferike. Kjo ndeshje do të luhet nesër në orën 12:00.

Të dielën në orën 13:30 do të luhet edhe ndeshjet Besa-Iliria dhe Kukësi-Skënderbeu, që do të transmetohen  në rrjetin e Radio Televizionit Shqiptar.