Aeroplanmbajtësja më e fundit dhe më e avancuar e Kinës, Fujian, ka hyrë zyrtarisht në shërbim aktiv, duke shënuar një hap të madh përpara për ambiciet detare të Pekinit në konkurrencën me Shtetet e Bashkuara për dominim në oqeane.

Presidenti Xi Jinping kryesoi ceremoninë e vënies në punë të anijes në bazën detare të Sanya, në ishullin Hainan, sipas raportimeve të transmetuesit shtetëror CCTV.

Fujian është aeroplanmbajtësja e tretë e Kinës dhe e para që përdor një katapultë elektromagnetike (EMALS), teknologji e ngjashme me atë që përdoret në aeroplanmbajtësen më të re të SHBA-së, USS Gerald R. Ford. Ky sistem lejon lëshimin e avionëve me ngarkesa më të rënda karburanti dhe armatimi, duke u dhënë atyre rreze më të madhe veprimi dhe aftësi më të fuqishme goditëse.

Megjithatë, pavarësisht këtij progresi teknologjik, ekspertë ushtarakë amerikanë vlerësojnë se operacionet ajrore të Fujian janë aktualisht vetëm rreth 60% aq efikase sa ato të transportuesve amerikanë të klasës Nimitz, të cilët përdorin katapulta me avull.

Ndryshe nga aeroplanmbajtëset amerikane, asnjë nga anijet e këtij lloji në flotën kineze nuk është me energji bërthamore, gjë që kufizon autonominë e tyre në det të hapur. Fujian përdor karburant konvencional dhe duhet të ndalet për furnizim ose të takohet me cisterna mbështetëse gjatë misioneve të gjata.

/rtsh.al/