Kolegji Zgjedhor Gjyqësor, i mbledhur në ambientet e Gjykatës Administrative të Apelit, ka marrë një vendim unanim që zhbllokon bllokadën e krijuar brenda Komisionit Qendror të Zgjedhjeve (KQZ) lidhur me zgjedhjet e pjesshme për kryetar në disa bashki, të caktuara për datën 9 Nëntor 2025.

Kolegji, i përbërë nga gjyqtarët Ornela Naqellari (Relatore), Enkel Peza, Lutfije Celami, Entela Shedula dhe Alma Kodraliu, pranoi kërkesëpadinë e Partisë Socialiste (PS), e përfaqësuar nga Eridian Salianji, kundër Komisionit Qendror të Zgjedhjeve (KQZ) dhe Komisionit Rregullator.

Çfarë vendosi Kolegji?

Partia Socialiste kundërshtoi mosmarrjen e katër vendimeve thelbësore nga Komisioni Rregullator, të cilat kishin ngecur pasi nuk kishin marrë numrin e nevojshëm të votave (3 vota pro kundër 2 kundër). Vendimi i Kolegjit Zgjedhor, i shpallur sot, miraton projektvendimet e Komisionerit Shtetëror të Zgjedhjeve duke:

Miratuar afatet procedurale të zgjedhjeve.

Miratuar karakteristikat teknike të fletës së votimit.

Miratuar përdorimin e pajisjes së identifikimit elektronik të votuesve.

Miratuar përdorimin e kamerave regjistruese dhe monitorëve në Vendet e Numërimit të Votave (VNV).

Përjashtimi i rëndësishëm

Në një detaj të rëndësishëm, vendimi i Kolegjit Zgjedhor, megjithëse fillimisht PS-ja kërkonte miratimin për Bashkitë Tiranë, Berat, Tepelenë, Cërrik, Mat dhe Vlorë, përjashton Bashkinë Tiranë nga zbatimi i këtyre projektvendimeve. Kështu, afatet dhe teknologjia e re do të zbatohen vetëm në Berat, Tepelenë, Cërrik, Mat dhe Vlorë.

Vendimi i Kolegjit, sipas nenit 4 të tij, është i formës së prerë dhe nuk lejohet ankim. Administrata e KQZ-së është ngarkuar menjëherë për zbatimin e tij, duke i hapur rrugën përgatitjeve finale për procesin zgjedhor të 9 Nëntorit. Partia Demokratike e Shqipërisë ishte e thirrur në këtë proces si person i tretë, por ishte në mungesë.

/rtsh.al/