Një mbledhje e përbashkët e Komisionit për Ekonominë, Punësimin dhe Financat dhe Komisionit për Nismat Qytetare, Bashkëpunimin dhe Mbikëqyrjen Institucionale, drejtuar nga Milva Ekonomi, ka shënuar hapa të rëndësishëm drejt miratimit të vlerësimeve vjetore të disa institucioneve kyçe.

Banka e Shqipërisë (BSH) ishte e para në rendin e ditës. Projekt-rezoluta për vlerësimin e veprimtarisë vjetore të BSH-së u prezantua nga relatori, deputeti Erion Braçe. Pas diskutimeve të anëtarëve, rezoluta u miratua pa ndryshime, duke mbështetur variantin e paraqitur.

Mbledhja vijoi me shqyrtimin e raportit të Institutit të Statistikave (INSTAT). Relatori i kësaj projekt-rezoluta ishte Admir Kadeli, i cili prezantoi disa përditësime të dakordësuara paraprakisht. Pas shkëmbimit të ideve, projekt-rezoluta për INSTAT-in u miratua me shumicën e votave të anëtarëve të pranishëm.

Amendime për Autoritetin Mbikëqyrës Finanicar

Në fund të mbledhjes, u shqyrtua projekt-rezoluta për vlerësimin e veprimtarisë së Autoritetit të Mbikëqyrjes Financiare (AMF), me Zamira Sinaj si relatore.

Gjatë këtij shqyrtimi, Braçe paraqiti disa amendamente (ndryshime). Palët arritën në një dakordësi parimore që këto ndryshime të integrohen brenda projekt-rezolutës origjinale. Votimi përfundimtar për këtë rezolutë do të shtyhet për mbledhjen e radhës, për të mundësuar përfshirjen e ndryshimeve të dakordësuara.

/rtsh.al/