Komisioni për Çështjet e Brendshme dhe të Mbrojtjes ka përmbyllur një vizitë dyditore monitoruese në qarqet e Dibrës dhe Matit. Ky inspektim u zhvillua në kuadër të ushtrimit të funksionit të kontrollit parlamentar, me synim vlerësimin nga afër të performancës institucionale, sigurisë publike dhe cilësisë së shërbimeve që u ofrohen qytetarëve në këto rajone.

Agjenda e deputetëve u shtri në disa institucione kyçe dhe pika strategjike kufitare e të ekzekutimit të vendimeve penale, duke evidentuar sfidat kryesore me të cilat përballen autoritetet lokale dhe ato të sigurisë në terren.

Gjatë ditës së parë të vizitës monitoruese, anëtarët e komisionit u ndalën fillimisht në Bashkinë e Dibrës, ku u njohën me ecurinë dhe problematikat e ofrimit të shërbimeve publike nga kjo njësi e vetëqeverisjes vendore. Takimet vijuan në Drejtorinë Vendore të Policisë Dibër, ku vëmendja u përqendrua te garantimi i rendit, siguria publike dhe strategjitë për luftën ndaj kriminalitetit.

Më pas, delegacioni parlamentar inspektoi Pikën e Kalimit Kufitar në Bllatë. Diskutimet me drejtuesit e pikës doganore u fokusuan te funksionimi i procedurave, menaxhimi efikas i flukseve të hyrje-daljeve të shtetasve dhe mallrave, si dhe te nevoja për të forcuar bashkëpunimin ndërinstitucional për të parandaluar paligjshmërinë transkufitare.

Inspektim në IEVP Burrel dhe takimi në Bashkinë Mat

Në ditën e dytë të inspektimit, komisioni u zhvendos në qarkun e Matit, ku vizitoi Institucionin e Ekzekutimit të Vendimeve Penale (IEVP) në Burrel. Në këtë institucion penitenciar, deputetët u ndalën veçanërisht te kushtet e sigurisë, standardet e administrimit dhe trajtimi i personave të privuar nga liria, me qëllim garantimin e respektimit të të drejtave ligjore.

Inspektimi u përmbyll me një takim në Bashkinë e Matit, ku u analizua funksionimi i shërbimeve ndaj komunitetit dhe shkalla e koordinimit të kësaj njësie me institucionet e nivelit qendror.

Përgjatë të gjitha ndalesave, anëtarët e komisionit u njohën në mënyrë të detajuar me pengesat operacionale dhe masat e ndërmarra nga drejtuesit lokalë për rritjen e efektivitetit në punë. Të dhënat e mbledhura gjatë kësaj vizite pritet të shërbejnë për hartimin e raporteve parlamentare mbi gjendjen e sigurisë dhe administratës në këto dy qarqe.

/rtsh.al/