Komisioni Parlamentar për Çështjet Ligjore dhe Administratën Publike, ka përmbyllur procedurat për plotësimin e vendit vakant të Komisionerit për Mbikëqyrjen e Shërbimit Civil (KMSHC), duke kualifikuar Lefterije Lleshin si kandidaten e vetme që plotëson kushtet ligjore.

Gjatë mbledhjes së zhvilluar për shqyrtimin e dokumentacionit, kryetari Ulsi Manja informoi anëtarët se procesi ka arritur të sigurojë një mbështetje të gjerë ndërpartiake për kandidaturën në fjalë.

Sipas Manjas, pas dëgjesave të zhvilluara, Lleshi ka arritur të mbledhë numrin e nevojshëm të firmave mbështetëse nga të dyja kahet e politikës. “Kandidatura e znj. Lefterije Lleshi ka mundur të marrë mbështetjen e 28 deputetëve të opozitës dhe 36 deputetëve të grupit parlamentar të PS-së,” bëri me dije Manja.

Ky bashkim firmash e bën atë kandidaturën e vetme në garë për këtë post të rëndësishëm që mbikëqyr administratën publike.

Në përfundim të procedurës së verifikimit, Komisioni vendosi me shumicë votash që kandidatura e znj. Lleshi t’i kalojë për shqyrtim dhe votim final seancës plenare të Kuvendit.

Miratimi në seancë pritet të formalizojë mandatin e saj në krye të KMSHC-së, duke i dhënë fund vakancës në këtë institucion.

/rtsh.al/