Një ngjarje e rëndë ka ndodhur gjatë natës në zonën e Olmos, në periferi të Arezzo, ku një 30-vjeçar shqiptar është qëlluar për vdekje me armë zjarri.

Viktima, Gj.P., banues në Frassineto, u ekzekutua rreth orës 23:40 pranë restorantit Chez Vous. Sipas hetimeve paraprake, ai është qëlluar me të paktën katër plumba ndërsa ndodhej në një kalim për këmbësorë mes një bari dhe restorantit.

Një nga plumbat e goditi në qafë, duke i shkaktuar vdekjen e menjëhershme.

Alarmin e dha pronari i lokalit, i cili pasi dëgjoi të shtënat doli jashtë dhe gjeti trupin e pajetë të të riut. Dyshohet se pronari i lokalit ka parë edhe autorin të largohej me një automjet tip Audi me ngjyrë të errët.

Forcat e rendit nisën menjëherë kërkimet, duke bërë të mundur arrestimin e autorit të dyshuar rreth orës 02:00 të mëngjesit.

I dyshuari, shtetas shqiptar 35-vjeçar, u ndalua pa bërë rezistencë dhe ndodhet në paraburgim, në dispozicion të autoriteteve gjyqësore.

Trupi i viktimës u transportua në morgun e spitalit San Donato Hospital, ndërsa hetimet vijojnë nga policia dhe karabinierët, nën drejtimin e prokurores Emanuela Greco.

Sipas të dhënave paraprake, krimi dyshohet të ketë ndodhur për motive xhelozie. Viktima, pas përfundimit të punës, ishte ndalur për të biseduar me ish-partneren e tij, një shtetase rumune. Në atë moment, partneri aktual i saj ka mbërritur në vendngjarje dhe, pasi i ka parë bashkë, ka qëlluar me armë zjarri, duke e lënë të vdekur në vend.

Hetuesit po punojnë për të zbardhur plotësisht rrethanat e ngjarjes, e cila gjithnjë e më shumë po merr formën e një vrasjeje për motive pasioni.

/rtsh.al/