Udhëheqësi i Partisë Popullore Evropiane (EPP), grupi më i madh në Parlamentin Evropian, Manfred Weber, ka bërë thirrje të premten për dërgimin e trupave nën flamurin evropian për të ndihmuar në sigurimin e një marrëveshjeje të ardhshme paqeje në Ukrainë.

Kjo deklaratë vjen pas raundit të fundit të bisedimeve mes Uashingtonit dhe Kievit, të cilat prodhuan një plan me 20 pika për të përfunduar luftën, plan që tani është në shqyrtim në Moskë.

Propozimi përfshin garanci sigurie të paspecifikuara për Ukrainën, si dhe forca ndërkombëtare të vendosura përgjatë vijës së frontit për të monitoruar zbatimin e çdo marrëveshjeje.

“Dua të shoh ushtarë me flamurin evropian në uniformat e tyre” u tha Weber një grupi mediash gjermane, duke shtuar se flamuri “duhet të valëvitet” në vijën e frontit pas një armëpushimi ose marrëveshjeje paqeje.

Sipas Weberit, Evropa duhet të marrë përgjegjësinë për sigurinë e Ukrainës, në vend që ta lërë në duart e Donald Trump për të siguruar paqen me trupa amerikane.

Disa aleatë të Ukrainës kanë sinjalizuar tashmë gatishmërinë për të dërguar trupa, duke përfshirë Mbretërinë e Bashkuar, Francën, Suedinë, Danimarkën, Norvegjinë, shtetet baltike dhe Holandën

“Kur flasim për trupa evropiane, Gjermania nuk mund të qëndrojë mënjanë”, tha politikani bavarez.

Duke komentuar strategjinë e fundit të sigurisë kombëtare të Trump, ku ai u kërkoi aleatëve të “ndajnë barrën e përgjegjësisë rajonet e tyre”, Weber argumentoi se Evropa duhet të bëjë pjesën e vet.

Në të njëjtën ditë, Sekretari i Përgjithshëm i NATO-s, Mark Rutte, tha se mbrojtja evropiane nuk duhet të jetë e pavarur nga SHBA-ja, pasi është “absolutisht e bindur” se Uashingtoni ende mbështet aleancën.

/rtsh.al/