Një ditë pas nisjes së aksionit për pastrimin e akseve rrugore dhe disa javë nga fillimi i punës për lirimin e hapësirave publike në zonat urbane, Kryeministri Edi Rama ka shprehur sërish vendosmërinë për ta çuar deri në fund reformën për pastrimin e territorit.

Në një postim në rrjetet sociale, Rama ndan pamje nga puna që po zhvillohet në terren për lirimin e trotuareve të zaptuara në mënyrë të kundërligjshme.

“Sigurisht jo vetëm ngrehinat prej hekuri, por edhe platformat e gjithfarëllojshme nën to do të zhbëhen hap pas hapi, përditë dhe me durim, derisa të vendoset kudo kufiri që garanton lirinë e hapësirës komunitare dhe përcakton deri ku mund të shtrihen tavolinat, karriget dhe çadrat e njësive tregtare”, shkruan Rama në reagim.

Nga dita e djeshme, Inspektorati Kombëtar i Mbrojtjes së Territorit, në bashkëpunim me Policinë e Shtetit, ka nisur zbatimin në terren të masave konkrete për respektimin e distancave në segmentet rrugore në të gjithë vendin.

/rtsh.al/