Ogerta Manastirliu, kandidatja e Partisë Socialiste (PS) për kryetare të Bashkisë Tiranë, do të jetë e ftuara e parë në sezonin e pestë të podkastit “Flasim”, drejtuar nga Kryeministri Edi Rama. Intervista e plotë do të transmetohet më 5 tetor.

Përmes fragmenteve të shpërndara sot nga vetë Kryeministri, bashkëbisedimi synon të sjellë jo vetëm një rrëfim jete, por edhe të prezantojë profilin politik të kandidates së PS-së në garën për kryeqytetin.

Gjatë intervistës, Manastirliu reflekton mbi origjinën e saj dhe jetën personale.

“Kam lindur në Tiranë, me shumë njerëz përreth. Një kohë të madhe e kam shpenzuar në korridoret e Teatrit të Operas dhe Baletit… E shihja kiminë si përbashkimin e logjikës dhe imagjinatës. Është jo e lehtë të flasësh për veten,” shprehet ajo.

Nga ana e tij, Rama shprehu bindjen e fortë se Manastirliu “do të jetë kryetarja e re e bashkisë së Tiranës,” ndërsa e pyet kandidaten se si e ndjen këtë “barrë mbi supe.”

Në videon prezantuese, Kryeministri përmendi gjithashtu fluksin e jashtëzakonshëm të kërkesave për intervista nga një personazh tjetër, të cilin e përmendi si “Diella”.

Rama siguroi gjithashtu se “vazhdojmë të punojmë pa u lodhur, me durim, me këmbëngulje, me forcë të hekurt ligjore deri në fund,” në kuadër të mandatit të katërt të PS-së.

Podkasti “Flasim” është një format komunikimi i Kryeministrit me personazhe të ndryshme publike.

/rtsh.al/