Reklama e një platforme bastesh online, që përdor imazhin dhe zërin e Diego Armando Maradonës, të krijuar me inteligjencë artificiale, ka ndezur një debat të fortë në Argjentinë gjatë Botërorit 2026.

Spoti i transmetuar vazhdimisht gjatë pauzave të ndeshjeve, tregon ish-kapitenin e Argjentinës me pamjen e Kupës së Botës në Meksikë 1986. Ai jep një mesazh që lidhet me bastet sportive.

Kjo reklamë është kritikuar fuqishëm në rrjetet sociale, ku shumë ndjekës kanë kontestuar gjuhën e vënë në gojën e kampionit të madh që u nda nga jeta në 2020-ën.

Reklama konsiderohet e papërshtatshme për ta lidhur imazhin e Maradonës me lojërat e fatit. Kjo ngjarje ka rindezur po ashtu edhe debatin në lidhje me limitet etike të përdorimit të inteligjncës artificiale, duke riprodhuar zëra të personazheve që tashmë janë ndarë nga jeta.

Avokati Fernando Burlando ka pohuar se iniciativa është autorizuar nga familjarët e Maradonës, edhe pse jo të gjithë fëmijët ishin dakord me vendimin. Sipas shtypit lokal, kompania ka paguar rreth 100.000 dollarë për të drejtën e përdorimit të imazhit të ish-yllit argjentinas.